ROXAS CITY -Nagpa-athag ang Chief of Hospital sang Roxas Memorial Provincial Hospital ukon RMPH sa wala pagbaton sang mga asymptomatic covid patient nga ginadala sa nasambit nga ospital.
Ginpahayag ni Dr. Ramon Alex T. Nolasco nga ginkasugtanan sang Provincial Inter-Agency Task Force nga ang batunon lamang sa nasambit nga ospital amo ang mga nagpositibo sa RT-PCR kag Rapid test subongman ang mga COVID-19 suspect case nga nakabatyag sang sintomas.
Samtang ang mga nagpositibo sa RT-PCR kag Rapid test nga asymptomatic ang pagadal-on sa Temporary Treatment Facility sang mga natungdan nga mga LGU’s.
Suno kay Nolasco nga ginhimo ini nga tikang agud malikawan nga mapuno ang amo nga ospital kag mahatagan sang ligwa ang iban nga mga pasyente nga kinahanglan i-admit sa nasambit nga ospital.
Sa pihak nga gintumod ang RMPH nga COVID-19 hospital, gin-athag ni Nolasco nga nagabaton sa gihapon ang nasambit nga ospital sang mga pasyente apang para sa mga emergency cases gid lamang.
Ginpasalig naman ni Nolasco nga bukas ang iban nga mga district hospitals sa pagbaton sang mga pasyente.
