Ginpasakaan sang panumbungon sang National Bureau of Investigation (NBI) si Atty. Raul Lambino bangud sa pagpalapta sang peke nga impormasyon.
Ginkasuhan man sang NBI sa Department of Justice (DOJ) si anay National Youth Commission (NYC) commissioner Ronald Cardema.
Ginpahayag ni NBI Technical Intelligence Service Agent Allen Rey Delfin nga nagapangatubang ang duha sang kaso nga paglapas sa Article 154 sang Revised Penal Code ukon illegal use of means of publication ukon illegal utterances.
Mahimo sila mapreso sang isa ka bulan kag multahan sang P40,000 tubtub P200,000.
Nagtuhaw ang kaso sa putukputukan sang pag-aresto kay anay Presidente Rodrigo Duterte sang International Criminal Court (ICC) sang Marso 11, sa diin sa live video ni Lambino, ginpalapta sini ang balita nga nagpagwa sang Temporary Restraining Order (TRO) ang Korte Suprema para sa pag-aresto kay Duterte apang wala sang TRO nga gin-isyu.
Amo man ang ginhimo ni Cardema sang gin-interview siya sa Villamor Air Base agud depensahan si Duterte.
