Kapin sa 300,000 ka ektarya sang kagulangan sa Victoria, Australia, ang apektado sang lapnagon nga bushfire nga ginpalala sang mabaskog nga heatwave, suno sa mga otoridad.
Sa New South Wales, pila ka mga sunog malapit sa border sang Victoria ang yara sa emergency level, ang pinakamataas nga alert level, nga may temperatura nga nagalab-ot sa halos 40 Celsius, suno sa Rural Fire Service.
Suno sa mga report, masobra 130 ka mga estraktura ang apektado, lakip na ang mga balay, nga may ginabanta 38,000 ka mga puluy-an kag mga negosyo nga wala sang kuryente bangud sa kahalitan sang bushfire.
Ini ang pinakamalain nga sunog sa pungsod halin sang 2019–2020 Black Summer fires, nga nagsunog sang lugar nga pareho kadaku sa Turkey kag nagpatay sang 33 ka tawo.
Nagpalab-ot naman si Prime Minister Anthony Albanese sang nagpaandam nga ang Australia naga-atubang sang “extreme at dangerous” fire conditions, ilabi na sa Victoria sa diin ang daku nga bahin sang estado gindeklarar nga isa ka disaster zone.
Madamo nga mga parks kag campgrounds sa Victoria ang ginpasarado bilang paghalong kag gilayon nga ginmanduan ang mga residente sa lugar nga mag-evacuate.
