Nagpagwa sang paandam ang mga awtoridad sang Australia bangud sa tuman ka init sang panahon sa pila ka parte sang pungsod.
Suno kay Bombo Denmark Suede, international correspondent direkta sa Australia, yara sa “Advice” level ang Central Tablelands, Central West Slopes and Plains, Lower Western, Mid North Coast, Northern Rivers, Northern Tablelands, Riverina, kag Southern Tablelands.
Ginpahibalo sa mga pumuluyo nga padayon nga bantayan ang kondisyon sang panahon kag i-check ang forecast updates.
Samtang, mas mataas ang risgo sa Snowy Mountains, South West Slopes, kag Upper Western, nga yara naman sa “Watch and Act” level.
Sandig sa mga meteorologist, nagataas ang peligro sa ikaayong lawas sang tawo, gani ginarekomenda nga likawan ang paglagaw-lagaw kag pagpabilin sa guwa sa pihak sang tuman ka tagiti sang init.
Wala naman sang heat warning subong para sa Hunter, Illawarra, Metropolitan, kag South Coast districts.
Ginpahayag sang Bureau of Meteorology nga delikado ang heatwaves ilabi na sa mga tigulang, kabataan, gabusong, kag may yara sang balatian.
Pahayag ni Suede, nagrekomenda ang gobyerno nga magpabilin ang publiko sa lugar nga malamig, mag-inom sang madamo nga tubig, maglikaw sa mabug-at nga buluhaton sa mainit nga oras, kag magbulig sa nagakinahanglan.
