ROXAS CITY – Nagpaathag ang pamunuan sang Avantrac Heavy Machinery, Inc. natuhoy sa bus nga ila gin-deliver sa banwa sang Pilar.
Suno kay Engr. Shem Ponce, sales marketing sang nasambit nga kompaniya, wala sang kamatuoran nga wala sang ihibalo si Mayor Arnold Perez natuhoy sa nasambit nga transaksiyon apisar nga ang kontrata sini ang nadihon pa sang nakaligad nga administrasyon.
Una diri, ginklaro ni Ponce nga ‘rescue vehicle’ ang nasaad sa kontrata sang lokal nga gobyerno sang banwa kag sang ila kompaniya kag indi sang ambulansiya.
Ginpahayag ni Ponce nga sang tayuyon ang ila komunikasyon ni Perez kag sang nagpadulong ang alkalde sa Cebu City, iya ini ginhambalan nga magpadulong sa ila talatapan.
Suno diri nga nagpadulong ang alkalde sa ila opisina kag nakita man mismo ang nasambit nga bus.
Naghambal pa suno diri ang alkalde nga iya anay nga pabisitahan sa municipal engineer sang banwa ang amo nga bus antes ini ipa-deliver.
Suno kay Ponce nga gintsekyar man ni Engr. Francisco Botin ang amo nga bus kag naghambal sang pila ka mga disenyo nga luyag himuon sang alkalde sa bus.
Sang natabo na suno kay Ponce, gilayon na nila ini nga ginpadeliver sa amo nga banwa.
Apang natabuan suno sa iya nga wala ang alkalde sang adlaw sang pag-deliver rason nga ginbilin na lamang ang yabi kag mga dokumento sang salakyan sa iya nga opisina.
Nagpanindugan pa si Ponce nga indi mahimo nga indi pagbaydan sang nasambit nga banwa ang amo nga salakyan bangud wala man sila sang may nabaton nga anuman nga sulat ukon dokumento nga nagapakanselar sang nasambit nga kontrata.
