ROXAS CITY — Patay ang 29-anyos nga babaye matapos alegar ginkastigo sang iya live-in partner sa Barangay San Esteban, Pilar, Capiz.
Suno kay P/Insp. Generoso Algarne, hepe sang Pilar PNP, nasapwan na lamang ang bangkay ni Gloria Alayon sang amay sang iya live-in partner.
Ginpahayag ni Algarne nga mismo ang pamilya sang ginatudlo suspek nga si Jeffrey del Rosario ang nagdala sa lawas sang biktima sa Jesus Colmenares District Hospital sa Balasan, Iloilo kun sa diin gindeklarar ini nga dead on arrival sang attending physician.
Suno pa sa hepe nga madamo sang lagub kag bagras nga nakita sa lawas sang biktima nga ginapatihan tuga sang pagpangastigo ni Del Rosario.
Ginpahayag pa ni Algarne nga mahimo pagpangimon ang motibo sang suspek sa pagkastigo sa biktima.
Ginahulat man sang otoridad ang resulta sang post-mortem examination sa bangkay ni Alayon agud matul-id kun napatay gid man ini bangud sa kastigo.
Sa karon gina-ayam na sang mga otoridad ang suspek nga nagpalagyo matapos ang insidente.
