Ikaw ka-bombo ano ang imo sarang nga mahimo ukon ibaligya para lang masuno mo ang imo nga gusto?
Kaya mo man bala ayhan nga ibaligya ang imo kalag?
Didto sa Russia isa ka kontrobersyal nga “social experiment”ang natabosa diin ang isa ka 26-anyos nga babayi ginaalegar nga “nagbaligya sang iya kalag” sa balor nga 100,000 rubles ukon (ginabanta 67,000) agud magbakal sang mga Labubu dolls kag isa ka ticket sa concert.
Nagsugod ini tanan bilang isa ka joke gikan sa isa ka marketing expert nga nagpakilala sang iya kaugalingon bilang Dmitri sa Telegram.
Nag-post sia sang ad nga nagatanyag sang 100,000 rubles sa bisan sin-o nga magsugot nga ibaligya ang ila kalag paagi sa pagpirma sang kontrata gamit ang ila dugo.
Makaligad ang pila ka minuto, nakibot si Dmitri sang ang isa ka babayi, nga ginkilala lamang kay Karina, nagsabat kag nagbaton sang tanyag. Suno kay Dmitri, ginpirmahan ni Karina ang dokumento kag ginselyohan ini sang dugo.
Gingamit ni Karina ang kuwarta sa pagbakal sang mga Labubu dolls kag isa ka ticket sa concert para sa Russian folk singer nga si Nadezhda Kadisheva.
Suno kay Karina, wala siya labot sa iya “kalag” ukon kon ano man ang himuon sang bag-o nga tag-iya sini.
Apang, hugot nga ginpakamalaut sang Russian Orthodox Church ang hitabo. Paagi sa ila opisyal nga channel.
Ang hitabo nagtuga sang madamo nga paghinun-anon sa Rusya nahanungod sa mga limitasyon sa pamatasan sang mga eksperimento sa katilingban kag ang papel sang espirituwalidad sa moderno nga katilingban.
