ROXAS CITY-Pilason nga ginpadangat sa ospital ang isa ka 23 anyos nga babayi matapos ginluthang sang isa ka lalaki sa Barangay San Antonio, Tapaz, Capiz.
Ginkilala ang biktima kay Analyn Villanueva, may live-in partner kag residente sang nasambit nga lugar.
Sandig sa inisyal nga imbestigasyon ni Police Senior Master Sergeant Rocer Garde, imbestigador sang Tapaz Municipal Police Station, ginaalegar nga ginsinggitan sang suspek nga si Vergil Gayagaya, 34 anyos ang biktima kaupod ang live-in partner sini sang tion nga nagpauli sa ila puluy-an.
Dugang pa ni Garde nga nagguha ang biktima agud saraduhon ang gate sang hinali nga may naglupok nga armas luthang kabangdanan nga natumba ini.
Nagaguha sa imbestigasyon nga naglapos ang bala sa gate kag naigo ang biktima nga naglapos man sa liog sini sang tion nga nagpalupok ang suspek.
Madasig nga ginpadulong sa Tapaz District Hospital ang biktima apang gilayon nga ginsaylo sa Western Visayas Medical Center para sa dugang nga pagbulong.
Narekober sang mga kapulisan sa ginluntaran sang insidente ang (1) ka basiyo kag (1) ka wala naglupok nga bala sang ginapatihan .45 calibre nga armas luthang.
Madasig naman nga nakapalagyo ang suspek matapos ang insidente.
Nahibaluan nga may daan na nga hiligut-anon ang live-in partner sang biktima kag ang suspek.
