Bag-o bun-ag nga lapsag, ginlubong sang buhi sang iya nga iloy

BAYAMBANG, PANGASINAN – Ginlubong sang buhi sang isa ka iloy ang bag-o niya nga bun-ag nga lapsag nga babaye sa Bayambang, Pangasinan.

Suno sa imbestigasyon, natalupangdan sang isa ka mangunguma ang mga agi sang dugo sa duta, bangud sa pagkabalaka, iya ginpahibalo ang mga barangay officials kag iban pa nga pumuluyo.

Sa padayon sang pagsunod sang mga residente sa agi sang dugo, nakalab-ot sila sa isa ka puno kag nabatian ang paghibi sang isa ka lapsag.

Suno sa nagkuha ang lapsag, may higko sa ilong kag baba nga ginkuha nila antes ini gindala sa ospital.

Apang, sa wala magdugay ang lapsag ginbawian sang kabuhi.

Nakilal-an na sang mga otoridad ang iloy sang bata kag ginkustodiya na ini.