LAWAAN, ROXAS CITY, CAPIZ- Nagapabilin nga positibo ang panan-aw sang pamunuan sang Lawaan Integrated School (LIS), Roxas City sa ginapatuman nga pilot testing sang bag-o nga Senior High School (SHS) Curriculum sang Department of Education (DepEd) para sa School Year 2025-2026.
Sa interview sang Bombo Radyo kay Mr. Tomas Hupeda, Principal sang amo nga buluthuan, ginpahayag nga isa ang ila eskwelahan sa mga napili nga kalakip sa pilot testing sang bag-o nga kurikulum nga may katuyuan nga madiskubre ang epekto sini—positibo man ukon negatibo—para mapasangkad pa ang kalidad sang pagtuon sang mga estudyante.
Dugang pa sini, sa nasambit nga programa, ginbuhinan ang mga subjects sa diin gikan anay sa 31 nga subjects, 9 tubtob 12 na lang ka mga subjects nga ginakalakipan sang lima (5) ka mga core subjects nga Mabisang Komunikasyon, Life Skills, General Mathematics, General Science, kag Pag-aaral ng Kasaysayan at Lipunang Pilipino.
Samtang, ang mga wala na lakip sa core subjects pagatawgon bilang “electives”, kag pagatungaon sa idalom sang Academic kag TechPro —ang duha na lang ka focus nga track sa idalom sang bag-o nga sistema.
Nahibulan nga may yara sang 120 ka Senior High School students nga enrolled, kag nagalaum pa ang eskwelahan nga madugangan ini antes matapos ang enrolment sa Hunyo 30. Sa kabug-usan, naka-record na sang 1,767 ka enrolees ang Lawaan Integrated School as of June 19, 2025, kag nagalaum ang pamunuan nga maduganagn pa ini kag malapawan ang 1,770 enrolees sang nagligad nga tuig.
Ginpabutyag man ni Mr. Hupeda nga limitado pa ang mga classroom nga nagresulta sa shifting schedule—alas 6:00 sang aga tubtob alas 12:30 sang udto para sa Elementarya, kag pagkahapon para sa Sekondarya kun sa diin ginakabig nila nga dako nga pagpanghangkat. Apang, may yara na sang ginapatigayon nga mga tikang ang pamunuan agud madungan ang mga hulot-klasehan sa amo nga eskwlehan.
Nagpalab-ot man sang pagpasalamat ang administrasyon sang Lawaan Integrated School sa Division Office sa pagdugang sang mga manunudlo nga daku nga bulig sa pagsustiner sang kalidad sang edukasyon kag sa mga tawo kag sektor nga padayon nga nagasuporta sa mga programa sang DepEd, ilabi na sa tunga sang mga reporma nga ginapatuman sa edukasyon.
With a report from Bombo Jessa Mae De Los Santos
