Bag-o nga Taripa sang mga tricycle drivers, ginpatuman na; dako nga penalidad, nagahulat sa mga drivers nga matig-a sang ulo

ROXAS CITY – Ginapatuman na ang bag-o nga taripa sang mga tricycle drivers kung sa diin may yara sang adjustments pag-abot sa pletehan sa syudad sang Roxas.

Sa interview sang Bombo Radyo kay City Councilor Reynaldo Magallanes, chairman sang committee on transportation and public utilities, ginpahayag sini nga ang nasambit nga ordinansa gin-arubahan sadtong Disyembre pa sang tinalikdan nga tuig apang na-delayed lamang ang publication kung sa diin nagtakop na sadtong Agusto 23, 2024 Biyernes nga adlaw.

Suno kay Magallanes, nga sa ila ginhiwat nga public hearing nga gintambungan sang mga nagkalain-lain nga mga Tricycle Operator and Drivers Association (TODA), mga senior citizens, Person with Disabilities (PWD), kag mga estudyante nakasugtan ang P15.00 nga plete sa sulod sang 2 ka kilometros kung sa diin magadugang lamang sang P5.00 ang kada pasahero sa tion nga maglapaw na ini sa 1 kilometros.

Ginpahayag man ni Magallanes nga ang mga pasahero nga may discount ang magbayad lamang sang plete nga P10.00 sa sulod sang 2 ka kilometros kung sa diin dugang nga P5.00 sa dugang nga kilometros.

Kun basehan ang bag-o nga pagsuluktan, daw kaangay nga wala ini suno diri nagsaka kag ginhimuan lamang nila ini sang ordinansa agud mangin legal ang pagsuluktan.

Pananglitan ang driver sang tricycle magalapas sa nasambit nga pagsulundan magabayad ini sang penalidad kung sa diin ang 1^st Offense P1,500.00, 2^nd Offense P3,000.00 kag ang 3^rd Offense P5,000.00, ka gang 4^th Offense pagkansela sang prangkisa.

Ang nasambit nga penalidad ang base man sa ginrekomendar sang pila ka mga TODA kung sa diin ila lamang ginsuportahan kag agud mangin pa-andam sa mga drivers nga wala nagasunod sa instakto nga pagsulundan.

Kaangut sini, magapaskil ang pamunuan sang Traffic Management Unit (TMU) sa kada tricycle sang bag-o nga taripa kag subong man sa mga lugar nga matawo agud mahibaluan sang mga sumalakay kung pila ang ila ibayad.

Mahibaluan nga sa 3,500 nga mga tricycle drivers 1,518 pa lamang diri ang nagrenew sang ila mga prangkisa.

Ginsiling pa ni Magallanes nga sa nasambit nga penalidad, dako ang ila paglaum nga matahap na ang mga drivers nga nagasukot sang  sobra-sobra sa ila mga pasahero.

Mensahe sini nga indi paglantawon kung anu kabug-at ang mga penalidad kung intsakto kag sumulunod lamang ang mga drivers.