ROXAS CITY – Gin-athag sang pamunuan sang Capiz National High School nga inisyatibo sang mga ginikanan ang pag-amutay sang tig P200 para ibayad sa trainor sang ila kabataan nga maga-perform sa palaabuton nga Acquaintance Party Presentation sa Oktubre 12, 2024.
Sa interview sang Bombo Radyo kay Mr. Charlie Begas, School Principal sang nasambit nga buluthuan, ginpahayag sini nga may nag-initiate nga ginikanan sa isa ka section sang Grade 9 – Science Technology and Engineering Special Program nga mag-hire sang trainor agud magnami ang presentation sang ila kabataan kag nagpasugot man ang mayorya.
Suno diri nga may gin-assign ang mga ginikanan nga magkolekta kun sa diin sa 36 nga mga parents, 29 na ang nakabayad.
Aminado man si Mr. Begas nga kahapon lang ini nakahibalo sa amo nga isyu bangud yara ini sa Manila sang tinalikdan nga mga inadlaw.
Ginpatawag sini gilayon ang adviser sang amo nga section kag nagtuad ang adviser nga kagustuhan sang mga ginikanan ang pagkuha sang trainor.
Diri kag gindesisyonan nga indi nalang pagsukton ang indi luyag nga magbayad kag kun sin-o lamang ang gusto nga magboluntaryo.
Sa pagkamatuod suno kay Begas nga gina-discourage sini nga mag-hire sang mga trainor kag gin-athag sini nga wala niya gina-promote nga mag-hire sa anuman nga activities sa buluthuan.
Bangud sa natabo, gin-meeting sini ang tanan nga Department Heads kag ginpanugyanan nga indi na masulit ang amo nga sitwasyon.
