Yara na sa purenarya ang bangkay sang napatay nga backrider matapos nag-overshoot ang ila motorsiklo mnga ginasakyan sa National Highway sang Barangay Nasunogan, Dao, Capiz.
Ang napatay nga back rider amo si alyas “Ed”, 55-anyos, isa ka mangunguma, samtang ang driver naman sang tricycle amo si alyas “Martin” 49-anyos kag lunsay mga residente sang Barangay Manhoy, Dao, Capiz.
Sa interview sang Bombo Radyo kay Police Captain Rey Contreras Dordas, Hepe sang Dao, Municipal Police Station, iya ginpahayag nga papuli na kuntani ang duha sa ila puluy-an sa Barangay Manhoy sang hinali nalang nga nadulaan sang control ang driver rason nga nag-overshoot ini dalan.
Bangud sa mabaskog nga impact, ginbawian sang kabuhi ang backrider samtang napabilin naman sa ospital ang driver sang motorsiklo.
Sa subong yara na sa kustodiya sang Dao Municipal Police Station ang tricycle para sa nagakaigo nga disposisyon.
Nagpanawagan man ang natungdan sa mga motorista labi na sa mga nagabyahe nga nakainum nga maghalong gid agud malikawan ang pila ka mga insidente sa dalanon.
