Ginpaidalom sa postmortem examination ang bangkay sang lalaki nga ginbuno-patay sa banwa sang Pilar, Capiz.
Ang biktima amo si alyas Dodoy 23-anyos samtang ang supek naman amo si alyas Jorge, isa ka menor de edad, lunsay mga residente sang Barangay Sinamongan, Pilar, Capiz.
Sa interview sang Bombo Radyo kay Police Staff Sargeant Herbert Dela Vega, Imbestigador sang Pilar Municipal Police Station, iya ginpahayag nga nakabaton sila sang tawag halin sa Barangay Captain sang Baragay San Nicolas nga may nagluntad nga pagbun-anay sa ila nga barangay.
Suno kay Dela Vega, nag-abot ang biktima sakay sa iya motorsiklo halin sa Balasan, Iloilo kag samtang nagatindog ini nakibot nalang ang babaye nga natumba ang biktima kag sa pagtsekyar sini nakit-an nga may pilas na ini sa iya nga likod sa wala nga bahin sang iya nga lawas.
Gilayon man ini nga ginpadangat sa Jesus M. Colmenares Memorial District Hospital ang biktima apang ginbawian ini sang kabuhi samtang ginabulong bangud man sa naangkon niya nga pilas sa iya nga lawas.
Dugang pa ni Dela Vega, base man sa ila nga pag-usisa ang nasambit nga suspek kag biktima ang lunsay magpakaduha.
Nahibaluan daan nga hiligut-anon ang possible rason sang pagpangbuno sang suspek sa biktima.
Boluntaryo naman nga nagsungka ang suspek kag insigida nga gindala sa kustodiya sang DSWD – Pilar para sa nagakaigo nga disposisyon.
Sa subong, ginaasikaso na sang pamilya ang bangkay sang biktima kag disido man ini nga magpasaka sang kaso sa nasambit nga suspek.
