MAMBUSAO, CAPIZ- Pilason ang isa ka lalaki, matapos nga ginlabo sang iya nga paryente sa Barangay Burias, Mambusao, Capiz.
Ang biktima amo si alyas “Toto”, 47-anyos, samtang ang ginatudlo nga suspek amo si alyas “Nonoy”, 65-anyos, nga lunsay mga residente sang nasambit nga lugar.
Sa interview sang Bombo Radyo kay Police Captain Dennis Losbañes, Hepe sang Mambusao Municipal Police Station, iya ginpahayag nga base sa ila nga imbestigasyon, natabo ang amo nga insidente samtang nagabakal sang mantika ang biktima.
Dugang pa sini, samtang nakatalikod ang biktima, hinali ini nga ginlabo sang suspek kag na-igo ini sa itsura rason sang pag-angkon sang pilas.
Bangud sa pagpang-labo, gilayon nga nagtawag sang bulig ang mga residente kag ginpadangat sa pinakamalapit nga ospital ang biktima para sa nagakaigo nga pagbulong. Samtang, matapos nga nakomiter sang suspek ang pagpanglabo, nag-surrender naman ini sa kapulisan nga nagresponde.
Nahibaluan nga bangud sa daan nga hiligut-anon ang rason sang amo nga insidente.
Narekober naman sang mga kapulisan sa ginluntaran sang insidente ang isa ka bilog nga hinangiban ukon bolo nga amo ang gingamit sa pagpanglabo.
Sa karon, nagapabilin pa sa ospital ang biktima, kag ginahulat nalang ang desisyon sini kun magpasaka pa sang kaso batok sa suspek samtang yara pa ini sa karon sa kustodiya sang Mambusao Municipal Police Station.
With a report from Bombo Jessa Mae De Los Santos
