ROXAS CITY-Ginreklamo sa Bombo Radyo Roxas sang pila ka mga residente ang indi patas nga pagpanita sang isa ka empleyado nga nagabantay sa entrance sang Pontevedra Public Market sa mga nagasulod sa amo nga merkado nga wala sang may ginasuksuk nga faceshield.
Sa interview sang Bombo Radyo Roxas kay Alyas Junjun ginpahayag sini nga may yara sang pinilian si Evangeline Bebing Contreras sa iya mga ginapasulod nga mga indibidwal sa nasambit nga merkado.
Suno kay Junjun nga pabor gid ini sa pagsulundan sang merkado apang wala sini nauyunan ang patakaran ni Contreras.
Dugang pa sini nga wala ginasita ni Contreras ang iya mga kumpare kag kumare nga nagasulod sa merkado apisar nga wala sang may ginasuksuk nga faceshield ukon facemask.
Masami man nga wala sa puwesto si Contreras bangud ginaalegar nga nagpataya ini sang Small Town Lottery ukon STL.
Suno naman kay Alyas Maymay nga madamo na sang kontra si Contreras bangud sa iya nga patakan sa pagpasulod sang mga indibidwal sa amo nga merkado.
Ginkompirmar man sini nga masami ginapasulod sini ang iya mga kilala apisar nga wala sang may ginasuksuk nga faceshield.
Gindugang pa sang tagreklamo nga nagapataya ini sang STL bangud siya mismo ang nakataya kay Contreras.
Samtang, hugot naman nga ginpanginwala ni Mrs. Evangeline Bebing Contreras ang mga alegasyon natuhoy sang pagpili sini sang mga indibidwal nga nagasulod sa amo nga merkado.
Suno kay Contreras ginpanindugan sini nga patas kag wala ini sang may ginapasulod sa merkado nga wala sang faceshield ukon facemask.
Dugang pa ni Contreras nga siya mismo ang nagahatag sang faceshield sa mga tigulang nga nagasulod sa merkado nga wala sang may ginasuksuk nga faceshield.a
Samtang ginpanginwala man sini ang alegasyon nga nagapataya ini sang STL sa sulod sang merkado.
Suno sa iya nga ang mga nasambit nga alegasyon ang butang-butang gid lamang batuk sa iya kag wala sang kamatuoran.
