Roxas City – Nakabalhag sang kaso sang Afican Swine Fever (ASF) ang banwa sang President Roxas.
Ini ang ginkumpirmar ni Mayor Receliste Escolin sang ma-interview sang Bombo Radyo.
Suno kay Escolin, pina-agi sa ila Municipal Agriculture Office (MAO) sang ila banwa nahibaluan nga may yara sang residente sa Poblacion sa ila lugar nga nagahupot sang baboy nga nakitaan sang pila ka mga sintomas sang ASF kag ini ang napatay pila ka adlaw ang nakaligad.
Bangud sini, gilayon nila nga ginpadulungan ang lugar agud magpatigayon sang imbestigasyon kag kahapon nga adlaw naguha ang resulta sa diin positibo ini sa nasambit nga sakit.
Dugang pa sang alkalde, matapos sini mahibaluan ang resulta nagpatigayon sila sang disinfect sa lugar kag nagkuha sang mga samples sa iban pa nga mga baboy nga nabilin agud mahibaluan kun ini apektado ukon indi.
Mahibaluan, ang nasambit nga baboy personal nga hinupatan sang iya residente kag wala sang record nga nagikan sa iban nga lugar ukon merkado.
Angut sini, isa sa mga lihok nga ila ginpatigayon ang pagpatawag sang paghinala sa tanan nga mga Punong Barangay sa banwa agud hinalaan ang mga tikang nga dapat himuon agud mapunggan ang paglapta sang ASF sa iban nga mga hinupatan kag kaiping nga lugar.
Ginpahayag man ni Escolin nga nagapabilin sa gihapon nga istrikto ang ila banwa sa pagkatay sang baboy bangud kinahanglan sa slaughter house ini maga-agi kag indi sa mga puluy-an.
Mensahe sini sa mga naghupot sang baboy, magkig-angut sa ila sa tion makitaan sang pila ka mga sintomas sang sakit ang ila hinuptanan kag likawan nga magbakal sang mga karne sa kilid sang dalan.
