ROXAS CITY, CAPIZ – Magapatigayon sang barangay assembly ang Barangay Libas, Roxas City, bwas nga adlaw, Oktubre 26, agud istoryahan ang nahanungod sa emergency cash transfers para sa mga biktima sang lapnagon nga baha sang nagligad nga semana.
Sa interview sang Bombo Radyo kay Punong Barangay Jobby Nalica, iya ginpahayag nga maga-umpisa ang pagsinapol ‘las 9 bwas sa aga kag ini ang updan mismo ni Department of Social Welfare and Development (DSWD) Region 6 Director Joselito Estember.
Suno kay Punong Barangay Nalica, si Director Estember mismo ang mapaathag sang mga pagsulundan kag proseso sang mga makabaton sang cash assistance nga P10,000 kag P5,000.
Samtang, ginpahayag naman sang punong barangay nga nagakinahanglan pa ini sang masobra 1,300 ka mga family food packs para sa iya nga mga pumuluyo kag may yara naman sang pasalig halin sa Capiz Provincial Government nga hatagan ini sang dugang nga ayuda.
