Magahiwat sang State of the People Address ukon SOPA ang Bagong Alyansang Makabayan ukon Bayan Panay sa Lunes, Hulyo 28, kadungan sang ikaapat nga State of the Nation Address (SONA) ni President Ferdinand “Bongbong” Marcos, Jr.
Sa interview sang Bombo Radyo kay Elmer Forro, Secretary General sang Bayan Panay, ginpahayag nga ang katuyuan sang SOPA isa ka pamaagi agud ipabutyag sa publiko ang matuod-tuod nga kahimtangan sang pungsod nga ginapangatubang subong, ilabe na sa sektor sang mga mangunguma, transportasyon, kag ekonomiya nga apektado sang mataas nga inflation.
Suno pa kay Forro nga padayon nga nagaantos ang mga ordinaryo nga pumuluyo bangud sa manubo nga employment rate kag sa kabudlay sang kabuhi nga ginapalala sang mga isyu sa ekonomiya.
Dugang pa niya, wala sang klaro kag kongkreto nga tikang nga ginapakita ang administrasyon Marcos agud masolusyonan ang mga seryoso nga problema sa pungsod, lakip na ang mga isyu sa kalibutan, partikular ang epekto sang pagbaha sa mga komunidad.
Mensahe ni Forro sa Publiko, nga magpadayon sa pagkooperar sa pila la mga programa sang gobyerno apisar nga may kasaypanan ini kag magbinuligay ang tanan sa pag bantay sang maayo nga pang gobyerno sang aton mga opisyal para matagaan sang igtalupangud ang bwas damlag sang pungsod.
