ROXAS CITY – Anay man nga suspek sa pagpatay sa iya kaugalingon nga manghod ang biktima nga ginlabo-patay sang iya magulang sa Sitio Sapa, Barangay Adlawan, Roxas City.
Ini ang ginpahayag ni Punong Barangay Roberto Ross Roldan sang Barangay Adlawan, Roxas City sang mainterview sang Bombo Radyo base man sa iya pagkakilanlan sa pamilya sang suspek kag biktima.
Suno kay PB Ross, nakabaton siya sang report nagikan sa iya Barangay Kagawad nga may nagluntad nga insidente sang pagpanglabo kag pangbuno sa lugar sa diin gilayon niya man ini nga ginpadulungan agud respondihan.
Sa iya pagpadulong sa lugar, nakit-an sini ang lawas sang biktima nga nagahigda na sa madulom nga lugar kag madamo sang patal nga pilas sa iya lawas.
Matandaan nga wala makasalbar sa kamatayon si Gregorio Capote 43-anyos, labourer matapos ginapahayag ginlabo-patay sang iya mismo magulang nga si Jerry Capote 47-anyos, tricycle driver kag lunsay residente sang nasambit nga lugar.
Ginpahayag man sini nga ginhulat nila ang katapo sang Roxas City Emergency Response Team (RCERT) agud tsekyaron kun bala may yara pa sang pulso ang biktima apang bangud sa mga patal nga pilas tuga sang pagpanglabo kag pagpangbuno, gilayon ini nga ginbawian sang kabuhi.
Suno pa sa Punong Barangay nga base sa iya impormasyon nga nakuha, indi maayo ang pagsinundanay sang mag-ulutod kag masami nga nagatuga sang gamo ilabi na kung maka-inum sang makahulubog nga ilimnon.
Samtang, matawhay man nga nagsungka ang magulang nga suspek sini sa otoridad kag sa karun yara na sa kustodiya sang Roxas City Police Station para sa nagakaigo nga disposisyon.
