Pila ka mga salakyan nga nagalabay sa northbound lane sang C5 Katipunan malapit sa Ateneo de Manila University (ADMU) ang nabungguan matapos natumba ang poste sang kuryente kag billboard pasado alas 11 sini nga Sabado, Hulyo 19.
Suno kay Metropolitan Manila Development Authority (MMDA) chairman Romando Artes, wala sang may napilasan sa insidente.
Gin-athag sang opisyal nga posible natumba ang poste kag billboard bangud sa mabaskog nga huyop sang hangin bangud sa malain nga kondisyon sang panahon.
Bangud sini, temporaryo nga ginpasarado ang pila ka bahin sang C5 Katipunan malapit sa Ateneo.
Gani isa lang ka lane ang magamit halin sa Ateneo de Manila University, Katipunan Avenue pakadto sa Commonwealth Avenue.
Ginpatuman man ang traffic rerouting sa lugar kun sa diin ginapahanugutan nga makaagi ang mga light vehicle sa ADMU.
Ang mga halin sa C5 Katipunan mahimo nga magsakay sa Aurora Blvd agud makakadto sa ila destinasyon.
Gani, ginapanugyanan ang mga motorista nga mag-agi anay sa alternatibo nga ruta.
Samtang, gilayon man nga nag-aksyon ang MMDA kag iban pa nga departamento agud ma-regulate ang dalagan sang trapiko sa nasambit nga dalan kag mapasiguro ang safety sang mga nagalabay sa Katipunan.
