ROXAS CITY – Patay ang 18-anyos nga lalaki matapos naghikog sa sulod sang ila balay sa Alba Village, Barangay Dinginan, Roxas City.
Ginkilala ang biktima nga si Rolly Ballos Jr.
Antes naghikog ang biktima nagkaupod pa sila sang utod nga si Ronnie Ballos nga nag-inum.
Apang nag-initay ang duha tobtob nagguwa na lamang sa bahay ang utod sang biktima.
Nakibot na lamang ang pamilya Ballos sang nag-abot ang barangay tanod kag ginpahibalo nga may nakita ini nga nagabitay sa kusina.
Gilayon nga nagpadulong sa kusina ang mga miyembro sang pamilya sa diin ila nakumpirma ang impormasyon sang tanod.
Gindala pa sa ospital ang biktima apang gindeklara nga dead on arrival sang doktor.
Nagaguwa sa imbestigasyon sang mga pulis nga problema sa pamilya ang rason sang pagpanginmatay ni Ballos Jr.
