ROXAS CITY – Naalarma ang mga empleyado sang Bureau of Internal Revenue (BIR) sa Mckinley Street, Barangay 3, Roxas City matapos nakabaton sang ‘bomb threat’.
Sa interview sang Bombo Radyo kay Provincial Disaster Risk Reduction and Management Office (PDRRMO) Head Judy Grace Pelaez, gilayon sila nga nagresponde kaupod ang mga miyembro sang Roxas City Police Station, Roxas City Fire Station, Philippine Coast Guard agud makordonan ang palibot sang opisina.
Isa ka empleyado ang nakabaton sang text message nga nagpaandam nga kinahanglan nila nga magbiya sa lugar bangud may gintanom nga bomba sa sulod sini.
Bangud diri, temporaryo nga ginpauntat ang transaksiyon sa nasambit nga opisina kag gin-abisuhan ang mga tawo nga magbiya sa lugar.
Ginlibot sang mga otoridad ang kabug-usan sang opisina kag base man sa paglibot sang ila nga K9-units, wala man sang nakit-an nga makaduluda nga butang.
Sa karon, nagapadayon ang imbestigasyon sang mga otoridad sa nasambit nga insidente.
