Gintamyaw ni anay Department of Education Secretary kag Vice President Sara Duterte ang mga manunudlo sang pungsod kadungan sang selebrasyon sang kahapon.
Sa mensahe nga ginpagwa sang bise presidente, nagpasalamat siya sa mga sakripisyo kag dedikasyon sang mga manunudlo agud nga matudluan ang mga kabataan nga mga Pilipino.
Suno diri, wala sang kakapoy nga pagserbe sang mga manunudlo nga halin sa sulod klasehan kag mga komunidad ang nagapakita sang ila nga dedikasyon agud nga mangin mabakod ang pungsod.
Ginaengganyo naman sang anay Education Secretary ang gobyerno kag tanan nga mga Pilipino nga mag-invest sa edukasyon agud nga masolbar ang kapigaduhon sa pungsod.
Gin-emphasize man sang bise presidente nga sa bulig sang mga manunudlo nalab-ot sang mga bata ang ila nga handom kag napakita ang ila nga mga potensyal.
