ROXAS CITY – Ginapanindugan sang chairman sang Committee on Finance and Appropriations sang Sangguniang Panlalawigan nga kinahanglan magre-convene ang Provincial Development Council (PDC) agud matalakay ang nakita nga duplication sa mga proyekto nga pagakuha-on sa 20% development fund sang Annual Investment Program (AIP) para sa tuig 2020.
Ini ang ginpahayag ni Board Member Jonathan “Sonny” Besa sang mainterview sang Bombo Radyo.
Suno kay Besa nga nakapapasar na sang resolution ang sangguniang kag ginrefer pabalik sa executive department ang AIP agud sila na ang magpahimu sang mga corrections bangud wala na sa ila poder ang nasambit nga mga dokumento.
Nagapati si Besa nga ang solusyon agud dalayon na nga mapapasar ang AIP 2020 amo ang pag-reconvene sang PDC agud matalakay ang pila ka nakita nga discrepancy sa mga proyekto nga ginapatuman sa kabanwahanan.
Indi naman pabor si Besa nga butangan lamang sa ‘kolatiya’ ang mga proyekto nga una na nga nakita nga may yara sang problema bangud magabalik man ini sa gihapon sa Sangguniang Panlalawigan nga wala ma-review sang insakto.
Nakahanda naman nga magtambong ang tanan nga katapu sang provincial board sa tion nga ipatawag sila sang gobernador para sa pagsinapol.
Samtang wala man malikawan ni Besa nga ipahayag nga may yara sang isa ka tawo nga nagapamalabag nga magpatigayon sang PDC meeting agud matadlong ang mga nabuyagyag sang Sangguniang Panlalawigan.
Ginkatingala sang board member nga amo na lamang sini ang pagpugong sang wala gintumod nga persona nga magreconvene ang PDC bangud mismo ang gobernador ang desidido naman nga magpatigayon liwat sang PDC meeting.
