ROXAS CITY – Ginpatpat ni Board Member Thea Faith Reyes ang chairman sang Committee on Education, Science and Technology sang Sangguniang Panlalawigan ang Capiz Scholarship and Educational Assistance Program sang gobyerno-probinsiyal.
Sa idalom sang nasambit nga programa, may yara sang nanari-sari nga grupo ukon classification sang scholars nga ginalakipan sang MERIT SCHOLARS, SPECIAL COURSES SCHOLARS, TECH-VOC SCHOLARS, EDUCATIONAL ASSISTANCE PROGRAM SCHOLARS.
Sa MERIT SCHOLARS, magabaton sang 500 ka mga first year students scholars kun sa diin 250 diri ang sa private schools nga magabaton sang P5, 000 per semester kag 250 naman sa public schools nga magabaton sang P2, 500 per semester nga may maintaining average nga 85 percent with no failing grade.
Pag-abot naman sa SPECIAL COURSES SCHOLARS, may yara sang 125 ka mga aplikante nga batunon sa baylo nga ang ila kuhaon nga kurso amo ang environmental management, veterinary medicine, agriculture and fisheries courses.
Sa sini nga programa magabaton ang mga freshmen scholars sang P10, 000 per semester.
Para naman sa TECH-VOC SCHOLARS, paga-akomodaron ang mga out-of-school youth, unemployed adult, solo parents kag mga nagtapos sang Alternative Learning System (ALS) kun sa diin ini ang pagapondohan sang gobyerno-probinsiyal sang P1 milyon kada tuig magluwas pa sa igahatag nga counterpart sang Technical Education and Skills Development Authority (TESDA).
Sa EDUCATIONAL ASSISTANCE PROGRAM SCHOLARS naman, 500 ka mga estudyante ang akomodaron nga gikan sa pinaka-pigado nga pamilya sa baylo nga makapasar ang mga ini sa qualifying examination.
Diri magabaton sang P1, 000 per semester ang isa ka scholar tubtob sa ini ang makatapos sa pag-eskwela sa baylo nga may yara ini sang 75 percent nga general average kag wala sang failing grade.
Mahibaluan nga nagsugod na ang gobyerno-probinsiyal sa pagbaton sang mga aplikante para sa nasambit nga programa.
Apang sa pagsugod sang bag-o nga scholarship program sang gobyerno-probinsiyal, ginaganyat sang opisyal ang 808 ka mga existing scholars sa pag-apply para sa bag-o nga programa agud makaagum sang bulig sa ila nga pag-eskwela.
