ROXAS CITY, CAPIZ- Nagapangatubang sang tuman nga kabalaka ang mga pumuluyo sang Barangay Baybay, Roxas City matapos makita ang isa ka box jellyfish sa baybayon sang lugar, nga ginkabig nga isa sa mga pinaka-makahalalit nga jellyfish sa kalibutan.
Sa interview sang Bombo Radyo kay Kagawad Earl Valencia, sang barangay Baybay, ginpahayag nga personal niya ini nakita samtang sya ang naga-patrol gamit ang paddle board sa baybayon sang pagselebrar sang kapistahan ni San Juan Bautista.
Dugang pa sini, nakita niya ang jellyfish nga naga-utaw-utaw sa pangiliron sang baybayon malapit sa mga nagapaligo nga kabataan rason nga gilayon nya nga ginpahalin ang mga kabataan halin sa baybayon agud malikawan ang posibilidad nga madalitan sang amo nga sapat.
Samtang, nagpanugyan man ini sa mga dumuluong kag lokal nga pumuluyo nga maghalong kag mag-obserba sang palibot antes maglusong sa tubig.
Nahibaluan nga ang box jellyfish kilala bilang delikado kag makamamatay tungod sa iya malain nga lason nga makalaton sa sistema sang tawo sa sulod lang sang pila ka minutos.
Padayon ang pagmonitor sang mga opisyal sang barangay kag ginapangabay ang kooperasyon sang tanan agud malikawan ang disgrasya.
Interviewed by Bombo Francis Biñas
