ROXAS CITY – Nangin madinalag-on ang anum ka adlaw nga Brigada Eskwela 2019 sa tanan nga mga pampubliko nga eskwelahan sa idalum sa Capiz DepEd division.
Sa kabug-usan suno kay Dr. Roel Bermejo, schools division superintendent sang Capiz DepEd Division nga nangin significant ang resulta sang implementasyon sang tuigan nga programa sang ahensiya, bangud sa suporta, kooperasyon kag serbisyo sang tanan humalin sa mga stakeholders, volunteer groups, media partners kag magkatuhay nga ahensiya sang gobyerno.
Suno sa opisyal nga tanan nga 471 ka mga pampubliko nga buluthuan sa probinsiya ang madinalag-on nga napatigayon ang ila Brigada Eskwela sa diin pinaagi sini, nalimpyuhan ang palibot sang eskwelahan, napinturan ang mga hulot klasehan kag na-repair ang pila ka mga kalay-uhon nga bangko kag lamesa.
Bangud sa nangin maayo nga resulta sang aktibidad, makasiguro si Bermejo nga 99 porsyento na nga preparado ang mga eskwelahan sa pagbukas sang klase sa Hunyo 3, 2019.
Nagpahamtang man sang Oplan Balik Eskwela Task Force sa mga buluthuan, agud may pamangkutan ang mga ginikanan kag mga estudyante.
Samtang liwat pa nga ginpa-intiende ni Bermejo ang tanan nga boluntaryo kag indi compulsory ang pagpasakup sa Brigada Eskwela kag wala sang kamatuoran, nga kun indi magpakigbahin sa aktibidad ang ginikanan ukon estudyante, indi pagpirmahan ang ila nga clearance.
Ginpahanumdum pa sang opisyal nga istrikto nga ginapatuman sang ahensiya ang ‘’No Collection policy’’ subong nga enrollment period.
