Nakakuha sang nagkalain-lain nga kritisismo online ang British YouTuber nga si Max Fosh pagkatapos niya ginpeke ang iya kaugalingon nga kamatayon sa pagtinguha nga makakuha sang $50 nga refund gikan sa isa ka eroplano.
Suno kay Fosh, wala niya magamit ang iya plane ticket kag gintinguhaan niya nga i-refund ini. Apang base sa refund policy sang airline, ang rason lang nga ginabaton nila nga ibalik ang bayad amo ang kamatayon sang pasahero.
Bangod sini, nagkadto si Fosh sa Seborga, Italy, sa diin nakumbinsi niya ang isa ka lokal nga opisyal nga mag-isyu sang peke nga sertipiko sang kamatayon. Ginsumiter niya ini sa airline bilang “pamatuod” nga nagtaliwan na siya.
Apang suno sa iya abogado, delikado ang ginhimo ni Fosh kag mahimo magresulta sa isa ka kaso sang pagpangdaya, bisan pa nga kabahin lang ini sang joke para sa iya YouTube channel.
Apisar sang tanan, wala gihapon siya nakabaton sang refund. Apang, nag-trend ang iya video kag nakakuha sang nagkalain-lain nga reaksyon gikan sa mga netizens.
Madamo ang nalingaw, apang ang iban nagpahanumdom man sang importansiya sang paghangop sang refund policy sang airline antes magbakal sang ticket.
