Ginkumpirmar sang Philippine Coast Guard (PCG) nga may dako nga buho sa hull sang barko nga BRP Teresa Magbanua matapos tatlo ka beses ini nga ginbungguan sang barko sang China sa Escoda Shoal sang tinalikdan nga weekend.
Pahayag ni PCG spokesperson for the West Philippine Sea Commodore Jay Tarriela, nakit-an ang damage sa bridge wing kag sa freeboard sang barko.
Suno kay Tarriela, dako ang buho kag mahimo pa nga makaigo ang isa ka tawo nga resulta man sang direkta nga pagbunggo sang vessel sang CCG.
“There’s damage to the bridge wing, and also on the freeboard of the [MRRV] 9701. There’s this hole that was also… a result of the direct ramming conducted by the China Coast Guard (CCG), and also on this part,” suno kay Tarriela.
Samtang, wala naman sang personnel nga nasamaran sa amo nga insidente.
Nahibaluan nga naka-estasyon na ang BRP Teresa Magbanua sa Escoda Shoal halin sang Abril 2024 bangud sang reports nga may Chinese reclamation activities sa area.
Ginaakusahan sang Pilipinas ang China nga nagatukod sang artificial island kag nagapamatuod diri ang mga patay kag ginpangpudpod nga corals sa sandbars apang ginpanginwala naman ini sang Beijing.
Ang Escoda Shoal, isa ka coral reef formation nga may central lagoon nga napalibutan sang discontinuous shallow sections. Ginakabig ini bilang isa ka rendezvous point para sa mga barko sang Pilipinas nga pakadto sa Ayungin Shoal nga isa man ka contested feature sa West Philippine Sea nga kun sa diin naka-estasyon naman ang warship nga BRP Sierra Madre halin sang 1999.
