ROXAS CITY – Nag-apelar sang bulig kay President Rodrigo Duterte kag sa pamunuan sang Philippine National Police ang amay ni PO2 Cris Robert Castro, nga ginpatay sang riding-in-tandem sa ila nga balay sa Caloocan City para madala pauli ang bangkay sini sa Roxas City.
Sa interview sang Bombo Radyo Roxas kay Mr. Leni Castro, ginpahayag sini nga daku na ang balayaran sa punerarya gani nagapangayo ini sang bulig nga bisan katunga lamang ang mabayaran.
Nagpadulong na sa Manila ang isa ka utod kag tiya ni Po2 Castro para mabuligan ang asawa sang biktima sa pag-asikaso sa mga kinahanglanon nga dokumento para ma-proseso na ang iya nga benepisyo.
Nagpanindugan man si Mr. Castro nga gusto nila nga magpamilya nga madala sa Roxas City ang bangkay sang ila nga anak para diri ini ilubong bangud diri naba-se ang tanan nila nga pamilya.
Samtang suno diri nga bisan san-o wala nag-estorya ang iya anak nga may death threat ini nga nabaton bangud kun nahibaluan lamang sini, piliton sini si Po2 Castro nga magpauli na lamang.
Ginpabugal man sang pamilya Castro ang maayo nga track record sang anak sa iya nga serbisyo bilang pulis sa diin mismo si NCRPO Chief Director Guillermo Eleazar ang nagkumpirma nga bisan san-o wala nangin kapareho si PO2 Castro sa iban nga mga pulis nga naangut ang pangalan sa iligal nga aktibidad.
