ROXAS CITY, CAPIZ- Suspendido na ang byahe sang tanan nga sahi sang sakayan pandagat sa kalalawran sang probinsya sang Capiz bilang pagsiguro sa kaluwasan sang tanan sa pag-igo sang Bagyo Tino sa probinsya.
Sa interview sang Bombo Radyo kay Senior Chief Petty Officer Arnel Nisola, Chief Master at Arms sang Philippine Coast Guard Capiz, iya ginpahayag nga bangud sa naga-amat-amat na kusog ang hampak sang balud sa kalalawran, ginpakamaayo sang ila nga talatapan nga i-suspendir ang byahe.
Suno kay Nisola, may yara sang 14 ka teams tanan nga gintukod sa diin amo ang maga-responde sa tion sang bagyo.
Pahayag nya, wala naman sang may namonitor nga mga pasahero nga na-stranded sa tagsa ka mga pantalan sa probinsya.
Nahibaluan nga nakahanda na ang 94 tanan ka mga personnel sang ila nga talatapan sa paghatag sang gilayon nga bulig sa mga nagakinahanglan.
Nagpahanumdom naman ang natungdan nga maghalong ang tanan sa manug-abot nga bagyo ilabi na ang mga pumuluyo nga malapit sa higad sang baybayon.
Interviewed by Bombo Sunnie Mae Constantino Batencila
