Opisyal nga gin-appoint ang calico cat nga si Yontama bilang bag-o nga station master sang Kishi Station sa Kinokawa City sa Japan pagkatapos sang pormal nga seremonya nga gintambungan sang mga opisyal sang Wakayama Railway Electric company.
Ang posisyon nangin bakante pagkatapos sang kamatayon sang anay stationmaster nga si Nitama sang nagligad nga Nobyembre, nga nagserbisyo sa riles sa sulod sang halos isa ka dekada.
Sa pagpanguna ni Wakayama Electric Railway President Mitsunobu Kojima, isa ka medalya ang ginsuksok sa liog ni Yontama bilang simbolo sang iya bag-o nga papel kag responsibilidad sa nasambit nga estasyon.
Apisar nga para sa iban isa ini ka kalngawan, apang ang papel sang “cat stationmasters” seryoso kag importante sa kasaysayan sang estasyon.
Ang ila presensya nagaserbe nga mayor nga atraksyon sang mga turista nga nagapabuhi sang ekonomiya sang rural railway line nga sadto yara sa katalagman nga magsirado bangud sa kakulang sang pasahero.
Sa amo man nga okasyon, ginpakilala man sang kompanya ang ila pinakabag-o nga rekrut, si Rokutama, isa ka calico cat nga kuting.
Ginklaro sang tagdumalahan nga indi ini apprentice kundi isa ka “stationmaster candidate”.
Ginalauman nga padayunon nanday Yontama kag Rokutama ang legasiya nga ginbilin sang ila mga ginsundan sa pagganyat sang mga turista kag pagpapagsik sang komunidad.
