ROXAS CITY – Ginasiguro sang Capiz Electric Cooperative Inc. (CAPELCO) nga wala sang aberya nga matabo sa adlaw sang eleksyon, Mayo 9, 2022.
Ini ang ginkumpirmar ni Engr. Edgar Diaz, General Manager sang Capelco sang mainterview sang Bombo Radyo.
Suno diri, may yara na ini sang contigency plan kun sa din nagtukod ini sang Task Force Halalan nga maga-operate sa sulod sang 24 ka oras, agud mag-facilatate sa tanan nga generating facility pananglitan may yara sang emergency shutdown.
Pila sa mga preparasyon nga ginhiwat sang CAPELCO, amo ang pagpadala sang sulat sa mga power supplier nga untaton danay ang pagpatigayon nga pag-mentinar sang mga makina agud mahatagan sang ligwa ang adlaw sang eleksyon.
Dugang pa sini, gindoble ang numero sang maintenance sa syudad sang Roxas kag magapahamtang sang maintenance crew sa kada banwa para sa pag-monitor.
Gintuad man sang opisyal nga handa na ang CAPELCO, kalakipi na ang mga plano kag preparasyon para sa palaabuton nga Mayo 9, eleksyon.
