ROXAS CITY – Kumpiyansa ang pamunuan sang Capiz Electric Cooperative (CAPELCO) nga wala sang matabo nga shortage sa kuryente sa probinsya ilabi na subong nga summer season.
Ini ang ginpahayag ni Mr. Edgar Diaz, General Manager sang nasambitan nga ahensya.
Suno diri, nga indi bentaha sa ila nga ahensya ang brownout bangud una, nagaresulta ini sang kapiyerdihan sa ila bahin, wala sang sales kag magaresulta sang madamo nga reklamo nagikan sa mga konsumidor.
Matandaan nga sadtong nagligad nga adlaw naka-eksperyensiya sang brownout ang bilog nga syudad sang Roxas kalakip na ang munisipalidad sang Ivisan.
Ginapatihan nga bangud sa kadaanon kag sa mainit nga panahon rason nga naglupok ang suspension insulator nga koneksyon sang Panitan pakadto sa syudad sang Roxas ang gintunaan sang brownout.
Una na suno diri ang nagluntad nga grass fire sa bahin sang Arcabalo nga nagdugang tuga sang init.
Luyag lang i-klaro ni Diaz nga indi nagikan sa koneksyon sang CAPELCO ang ginhalinan sang pagkalupok bangud ang nasambitan nga koneksyon sang Panitan ang ginapanag-iyahan sang National Grid Corporation of the Philippines (NGCP).
