ROXAS CITY – Ginpaathag ni Capiz Environment and Natural Resources Office (CAPENRO) head Atty. Emilyn Depon nga ginahulat na lamang nila ang resolution sang Sigma Municipality angut sa plano sang gobyerno probinsyal sa pagpatindog sang Ecological Solid Waste Management sa Barangay Acbo, Sigma, Capiz.
Suno kay Depon nga nakadepende sa gihapon ang desisyon sang amo nga banwa natuhoy sa nasambit nga plano sang probinsya.
Ginpahayag pa sini nga daku ang nabulig sang ginpatigayon nga public consultation sang Provincial Government kag CAPENRO sa mga pumuluyo natuhoy sa importansya sang Ecological Solid Waste Management sa mga pumuluyo kun sa diin kadam-an ang napawaan ang mga ini kun ano ang tinutuyo sang amo nga plano sang probinnsya.
Ang nasambit nga resolusyon may kaangtanan sa pagbakal sang probinsya sang lote nga pagapatindugan sang amo nga Ecopark.
Dugang pa sini nga daku ini nga bulig para sa mga pumuluyo indi lamang sa amo nga banwa mangin sa bug-os nga probinsya.
Mahibaluan nga ang Environment Management Bureau ang magahatag sa probinsya sang P31 million nga pondo para sa nasambit nga proyekto.
Samtang, nagpasalig naman si Depon nga magabalik sila sa gihapon sa amo nga barangay agud magpatigayon liwat sang paghinun-anon angut sa nasambit nga plano.
Apang, ginpahayag sini nga nakadepende sa gihapon ang desisyon sa Municipality Council sang amo nga banwa kun dayunon ukon indi ang pagpatukod sang amo nga proyekto nga makabulig sa madamo nga mga tawo.
