ROXAS CITY -Preparado na ang Department of Education Capiz Schools Division sa tion nga madayon ang pormal nga pagbukas sang klase sa maabot nga bulan sang Agosto.
Ini ang ginpasalig ni Dr. Salvador Ochavo, Superitendent sang Department of Education-Capiz Schools Division sang mainterview sang Bombo Radyo.
Ginpahayag ni Ochavo nga magabalik na sa mga buluthuan ang tanan nga mga manunudlo sa Hunyo 1, 2020 agud magpreparar sang mga hulot, mga schedules, kag tanan nga mga alternatibo nga pamaagi para sa mga estudyante.
Suno sa kay Ochavo nga wala ini sang nakita nga problema sa mga buluthuan sa probinsiya sa ginapatuman sang Dep.ed national nga 15-24 ka mga estudyante ang dapat magtu-on sa isa ka hulot bangud normal na ini nga ginpatuman sang mga buluthuan sa probinsiya apang hugot nga ipatuman ang social distancing.
Gindugang pa ni Ochavo sa mga central schools ipatuman ang shifting of classes kag open school samtang sa mga dalagkuan nga buluthuan ipatuman ang most essential competencies sa diin igatudlo ang mga estudyante ang pinakaimportante nga subject.
Ginpabugal man ni Ochavo nga madugay na nga napreparahan sang Department of Education ang pila ka mga alternatives kag mga modalities nga ipatuman sa mga buluthuan sa tion sang kalamidad.
Ginkasubo naman ni Ochavo nga kanselado ang mga mass sports activities kaangay sang provincial meet, division meet, WVRAA, kag palarong pambansa bangud hugot nga ginapatuman ang social distancing
