ROXAS CITY – Madinalag-on nga natigayon ang ika-61 nga selebrasyon sang fish conservation week, sang Capiz Fisheries Summit 2024 nga ginpatigayon sa El Circulo Center, Pueblo de Panay township Brgy. Lawaan, Roxas City.
Sa mensahe nga gindul-ong ni Capiz Governor Fredinel H. Oto Castro, nagalab-ot ini sang pagpasalamat sa tanan nga nagtambong nga organisasyon, sang mga mangingisda, nagkalain-lain nga ahensya sang gobyerno, Local Government Units (LGUs), kag mga non-government organizations.
Suno kay Castro, prayoridad sini niya nga mahatagan sang livelihood program ang mga mangingisda agud makabulig sa ila pangabuy-anan ilabi na sa mga galastuan.
Mahibaluan nga tinutuyo sini nga programa nga mahatagan sang solusyon ang mga problema sang mga mangingisda ilabi na nga madamo ang padayon nga nagapatigayon sang illegal nga pagpangisda sa kalalawran nga sakop sang probinsya.
Pinaagi sa bulig sang Bureau of Fisheries and Aquatic Resources (BFAR) 6, Capiz Provincial Fisheries Office, kag USAID Fish Right, agud maaksyunan ang pila ka mga problema nga ginapalab-ot sang mga mangingisda.
