ROXAS CITY -Wala na sang plano pa si Capiz governor Esteban Evan Nonoy Contreras nga pasakaan sang panumbungon ang 19 anyos nga lalaki nga nagpost sa social media site sa Facebook nga luyag siya sini nga patyon.
Ini ang ginkompirmar ni Police Colonel Julio Gustilo Jr., Provincial Director sang Capiz Police Provincial Office sang mainterview sang Bombo Radyo.
Ginpahayag ni Gustilo nga ginpadulongan sang mga kapulisan si Arvin Jay Lepardo sang Barangay Ilaya-Ivisan, Ivisan, Capiz matapos nga nagreklamo sa kapulisan ang mga katapo sang Kabalaka Information Center sang gobyerno-probinsiyal sang Capiz.
Suno kay Gustilo nga sa ila pagpangusisa, ginkaakig ni Lepardo ang pag-anunsyar ni Contreras nga palawigon ang General Community Quarantine sa probinsiya sang Capiz.
Apang gin-athag ni Lepardo nga indi niya sang hungod nga pahugon ang gobernador bangud nadala gid lamang siya kag nagulpihan.
Emosyunal naman nga nag-public apology si Lepardo kag nagpasalig nga indi na pagsuliton ang nasambit nga post.
Matandaan nga nangin viral sa Facebook ang post ni Lepardo nga ginmulay sini si Contreras kag nagpahayag nga nami patyon ang nasambit nga gobernador.
