ROXAS CITY, CAPIZ- Nakarekord sang dako nga pagnubo sa inflation rate ang probinsya sang Capiz subong nga Agosto 2025, sandig sa datos sang Capiz Provincial Statistics Office (PSO) sang Philippine Statistics Authority (PSA).
Sa interview sang Bombo Radyo kay Ms. Rosiebelle Beluso, Head sang Philippine Statistics Authority –Capiz, iya ginpahayag nga nagnubo ang inflation rate sang probinsya sa -0.3% sbong nga Agosto, kun ipaanggid sa 4.3% nga narekord sag Agosto 2024.
Suno kay Beluso, nagapanguna nga rason sang pagnubo amo ang pagnubo man sang presyo sa mga pagkaon kag non-alcoholic berages nga may 68.8% nga amot sa kabilugan nga inflation sang probinsya.
Isa sa mga nagapanguna nga food groups nga nagnubo ang presyo amo ang karne sang baboy kag manok. Ginsundan ini sang renta sa balay, tubig, kuryente, iban pa nga gatong, personal care kag miscellaneous goods and services nga nagnubo sa 0.1% halin sa 0.5% sang kasubong nga bulan sang tinalikdan nga tuig.
Wala naman sang paghulag sa presyo sa mga sektor sang impormasyon kag komunikasyon, edukasyon,restaurant at iban pa nga serbisyo.
Pahayag pa nya, sa pihak sang pagtaas sa pila ka produkto, batyag sa gihapon ang pagnubo sang inflation sa Capiz, umpisa Agosto 2024 tubtob Agosto 2025.
Dugang pa sang natungdan, ang Purchasing Power of Peso (PPP) sa Capiz subong nga Agosto ang yara sa ₱0.77, nga buot silingon, kinahanglan sang mas dako nga balor sang kwarta agud makabakal sang kasubong nga kadamuon sang produkto ukon serbisyo tuga sang pagtaas sang mga balakalon sa pangkabilugan.
Reported by Bombo Sunnie Mae Constantino Batencila
