Ginapabugal sang Philippine Drug Enforcement Agency (PDEA) Region 6 nga 97.11% na nga mga barangay sa Western Visayas ang ginakonsidera nga drug-cleared sang 2025.
Sa interview sang Bombo Radyo kay Ma. Graziella Tanaleon, Spokesperson sang PDEA Region 6, iya ginpahayag nga pinaagi sa Barangay Drug Clearing Program, natigayon nga ma-deliberate sang madinalag-on ang mga barangay.
Sandig sa data sang PDEA Region 6, tatlo ka mga probinsya ang nakaangkon sang 100 percent drug-cleared status, ini amo ang Aklan, Antique kag Guimaras.
Samtang ang probinsya sang Iloilo may yara sang 99.94% nga mga barangay nga gindeklara nga drug-cleared, sa diin isa na lang ka barangay ang indi pa cleared.
Ang Capiz ang nakarekord sang drug-cleared rate nga 93.66% samtang ang Iloilo City ang may 62.78%.
Suno kay Tanaleon, subong nga tuig 2026, mas pabaskugon pa sang PDEA ang intelligence-driven operations.
Nanotaran sang ahensya nga gina-adjust man sang mga durugista ang ila methods kag estratehiya, rason nga dapat pabaskugon man kag hugton sang law enforcers ang intelligence capabilities.
Ginasiguro sang PDEA ang publiko nga magapadayon ini sa pagpakig-angot sa mga local government units, law enforcement agencies, kag komunidad agud mapabilin nga drug-free kag malinong nga rehiyon.
