ROXAS CITY – Padayon ang ginahimo nga surveillance sang Provincial Health Office (PHO) sa probinsya sang Capiz, kadungan sang nagataas nga kaso sang sakit nga Dengue.
Sa interview sang Bombo Radyo sa tagpamaba sang PHO Capiz nga si Mr. Ayr Altavas, ginpahayag sini nga base sa ila datos sumugod Enero 1 tubtob Agusto 31, 2024 naglab-ot na sa 2,370 ang kabug-usan nga kaso sang nasambit nga sakit kung sa diin 5 ang ginbawian sang kabuhi.
Suno kay Altavas sa nasambit nga numero 243 diri ang bag-o nga kaso kag kalabanan sa mga gin-igo nagapang-edaron sang 10 tubtob 19-anyos.
Mahibaluan nga nakapagkit ang banwa sang Cuartero sang 10 ka kaso kag 10 ang bag-o, Dao nga may 25 kag 10 ang bag-o nga kaso kung sa diin 1 ang ginbawian sang kabuhi, Dumalag 20 kag 11 ang bag-o, Dumarao-25, 15 ang bag-o kag 1 ang napatay, Ivisan-8 kag 7 ang bag-o, Jamindan 14 kag 12 ang bag-o, Maayon 10 kag 7 ang bag-o, Mambusao 21 23 ang bag-o, Panay 113 2 ang bag-o, Panitan 12 11 ang bag-o kag 1 ang napatay, Pilar 9 7 ang bag-o, Pontevedra 27 19 ang bag-o kag 1 ang ginbawian sang kabuhi, President Roxas 8 11 ang bag-o, Roxas City nga may 120 nga kaso 65 ang bag-o kag 1 ang napatay, Sapian 4 kag 2 ang bag-o, Sigma 16 13 ang bag-o nga kaso kag banwa sang Tapaz nga may 87 nga kaso kag 18 ang bag-o nga gin-igo.
Bangud sini, padayon nga nagahimo sang mga tikang ang ahensya sa pagpagkig-angut kag bulig sang pila ka mga talatapan agud matapna ang padayon nga paghabok sang sakit nga Dengue sa probinsya.
Panugyan ni Altavas sa publiko nga sundon kag ipatuman ang mga panugyan nga ginamando sang tagsa ka mga LGUs kg mag-kooperar agud malikawan ang nasambit nga balatian.
