ROXAS CITY – Ginpatpat sang tagpamaba sang Capiz Provincial Health Office (PHO) ang mga impormasyon sa anom ka mga dugang nga kaso sang coronavirus disease (COVID-19) nga narekord sa probinsiya.
Suno kay Mr. Ayr Altavas, nabalhag ang dugang nga anom ka mga kaso sadtong Hulyo 31, 2020, Biyernes nga adlaw.
Ginalakipan ini sang 24 anyos nga lalaki nga residente sang Tapaz kag wala sang travel history; 29 anyos nga lalaki nga residente sang Tapaz nga may history of travel sa Dubai, UAE kag Metro Manila; 25 anyos nga lalaki nga residente sa banwa sang Tapaz nga may history of travel sa The Netherlands kag Metro Manila; 37 anyos nga lalaki nga residente sang banwa sang Tapaz nga may history of travel sa London kag Metro Manila; 22 anyos nga babaye nga residente sang banwa sang Tapaz nga may history of travel sa Pasay City, Metro Manila; kag 1 ka tuig nga bata nga lalaki nga residente sang banwa sang Pontevedra nga may history of travel sa Bulacan.
Sa pangkabug-usan, nagdangat na sa 66 ang kaso sang COVID-19 sa probinsiya kun sa diin 48 diri ang aktibo nga mga kaso, 16 ang naka-rekober ukon nag-ayo na kag nagapabilin sa duwa ang napatay.
Samtang ginpahayag ni Altavas nga agud malikawan ang pagsalungkaki sang mga datos bangud sang problema sa database system, diretso na nga nagapakig-angut ang Capiz PHO sa Department of Health (DOH) Region 6.
Sa karon suno kay Altavas, may yara pa sang ginahulat nga kapin 556 ka mga pending results sang real-time polymerase chain reaction (RT-PCR) tests.
