ROXAS CITY – Ginkalipay sang Capiz Police Provincial Office (CPPO) nga dalagkuan ang nangin accomplishment report sang bug-os nga kapulisan sa probinsya sang Capiz.
Ini ang ginpahayag ni PMaj. Ruby Magallanes, Information officer sang Capiz PPO sang ma-interview sang Bombo Radyo.
Sa ila kampanya batuk sa iligal nga droga, naglab-ot sa P6 milyon ang kabug-usan nga nakumpiskar sumugod Enero tubtob Setyembre bangud man sa pagpanikasog kag koordinasyon sang nagkalain-lain nga estasyon sang kapulisan sang syudad kag banwa kag amu man sang kooperatiba kag Provincial Drug Enforcement Unit (PDEU).
Ilabi nila nga ginakampanya ang pagpamatuk sa iligal nga droga bangud suno diri daku ang kontribusyon sini sa pagsaka sang krimenalidad.
Nagapatigayon sila sang anti-illegal drug symposium sa mga buluthoan agud mangin aware ang kabataan sa malain nga epekto sang iligal nga droga.
Samtang, 4 ka most wanted person ang nagkaladakpan sang Roxas City PS, Cuartero, Ivisan, kag Panay MPS.
Sa other wanted person may kabug-usan nga 24 ang naaresto sang Roxas City PS, Dao, Dumalag, Dumarao, Mambusao, Panay, Pilar, Pontevedra, Pres. Roxas, Sapian, Sigma, kag Tapaz MPS.
Mas ginpasangkad man sang PNP ang bantay dagat batuk sa illegal fishing kag loose firearms batuk sa iligal nga paghupot sang armas-luthang.
Padayon man ang ila pagpahamtang sang checkpoint kun sa diin sang Oktubre 10 nadakpan ang Top 6 provincial level drug pusher sa banwa sang Pontevedra.
Ginapangayo sang Capiz PPO ang padayon nga suporta kag kooperasyon sang pumuluyo agud mapabilin ang kalinong kag katawhay sa probinsya sang Capiz.
