ROXAS CITY – Liwat nga nagpaandam ang pamunuan sang Capiz Police Provincial Office (CPPO) sa publiko nga likawan ang pagsulod sa mga investment scheme agud malikawan nga matuntuhan kag makuhaan sang daku nga kantidad sang kwarta.
Ini ang ginpahayag sang tagpamaba sang Capiz PPO nga si Police Executive Master Sergeant Donna Asmod sang mainterview sang Bombo Radyo.
Suno kay Asmod nga nagakadapat nga indi magpadasu-daso ang isa ka indibidwal nga magsulod sa isa ka investment scheme ilabi na kun wala ma-validate ang identity sang isa ka tawo nga naga-transact kag ang kompaniya nga iya gina-representar.
Ginpatpat man ni Asmod ang modus sang mga recruiters sa pag-recruit sang mga investors.
Kalakip diri suno sa iya ang pagpromesa sang mataas nga kantidad ukon balik sang gin-invest nga kwarta, nagapasiguro sang dako nga capital kag mabaskog nga track record sang ila nga kompaniya, paghatag sang plaso sa pag-invest sang kwarta, kag kun kaisa suno kay Asmod, nagadala pa ang mga ini sang tawo nga nagahatag sang ila testimoniya kun paano nag-umwad ang ila kabuhi pinaagi sa investment scheme.
Kun may kasubong sini nga mga insidente suno kay Asmod, gilayon lamang nga magreport sa mga kapulisan agud ma-validate kun rehistrado ang investment scheme sa Securities and Exchange Commission.
