ROXAS CITY – Yara na sa full alert status ang Capiz Police Provincial Office (CPPO) subong nga Semana Santa.
Ini ang ginpahayag ni Police Executive Master Sergeant Donna Asmod sang mainterview sang Bombo Radyo.
Suno kay Asmod nga nagtukod sang Task Group Semana Santa kasunod sang mandu ni Capiz PPO Provincial Director Police Colonel Canilo Fuentes.
Ginpahayag sini nga may kapulisan nga i-deploy sa mga area of convergence kasubong sang pantalan, pahugpaan, terminals, simbahan kag mga pilgrimage site.
Suno pa sa iya nga nakaplastar naman ang security measures sang kapulisan sa probinsiya kalakip na ang mga police stations.
Gindugang pa ni Asmod nga nagpakig-angot sila sa magkatuhay nga law enforcement agencies sa probinsiya agud magbulig sa pagpabilin sang kalinong sa lugar.
Nag-apelar man ang opisyal sa mga publiko nga magkooperar agud mangin matalunsay ang pag-obserbar sang Semana Santa subong nga tuig.
