ROXAS CITY – Ginkasubo sang mga kapulisan sang probinsya sang Capiz ang pagsaka sang numero sang mga naghikog sang tinalikdan nga tuig 2019.
Sandig sa datos sang Capiz Police Provincial Office (CPPO) may ara sang kabug-osan nga 39 ka kaso ang napagkit sang CPPO humalin sang bulan sang Enero tubtob Disyembre 2019.
Nagtaas sang 50 porsyento ang kaso kun ikumpara sang tinalikdan nga tuig 2018 nga may yara lamang sang 26 ka kaso.
Nahibaluan ang syudad sang Roxas ang may pinakamataas nga kaso nga nagalab-ot sa 13, Dumarao nga may yara sang 5 ka kaso, Dao nga may 4 ka kaso, Dumalag kag Tapaz nga may tag-3 ka kaso, Pilar kag Pontevedra nga may tag-2 ka kaso kag tag-isa naman sa banwa sang Ivisan, Jamindan, Mambusao, Maayon kag Panitan.
Samtang wala naman sang kaso nga napagkit sa banwa sang Panay, President Roxas kag Sapian.
Base naman sa CPPO Statistics of Suicide Incident 37 sa mga biktima ang nagbigti, 1 ang nagluthang sang iya kaugalingon kag isa naman ang indi matumod kun ano ang iya kinamatay.
Samtang, kadam-an naman sa mga biktima ang lunsay lalaki nga yara sa edad nga 30-anyos panubo.
