ROXAS CITY — Ginpanginwala sang hepe sang Capiz Police Provincial Office nga si PSSUPT. Samuel Nacion ang nagalagaw nga report nga may plano ang mga terorista nga grupo nga magpang-atake sa mga mayor nga siyudad sa pungsod sa Hunyo 30.
Sa interview sang Bombo Radyo kay Nacion, gin-athag sini nga indi verified kag wala ma-validate ang ginaalegar memorandum gikan sa isa ka unit sang pulisya nga nagapaandam sa tanan nga mga opisina nga mangin alerto sa amo nga pagpang-atake.
Aminado si Nacion nga personal man niya nabaton pinaagi sa cellphone ang amo nga report apang wala siya sang opisyal nga mensahe nga nabaton gikan sa mataas nga pamunuan sang pulisya nga nagakumpirmar sini.
Wala man sila sang nabaton nga report gikan sa ila information network sa komunidad nga may pamahog sang pagpang-atake gikan sa terorista nga grupo.
Mangin sa intelligence community sang pulisya ang wala man sang kasubong nga report.
Suno pa sa iya nga kun magagikan gid man sa intelligence community sang pulisya ang isa ka report, kumpirmado ini kag maathag kag gilayon nga ginapadala sa natungdan nga mga unit sang pulisya agud gilayon nga maaksyonan.
Indi ini kaangay sang nagalapta nga mensahe sa karun nga wala man gani makumpirmar sang pulisya.
Mahibaluan nga base sa nagalapta nga report, magalunsiyar sang pagpang-atake ang mga katapo sang ISIS, Maute terror group kag Bangsamoro Islamic Freedom Fighters sa mga mayor nga siyudad sa pungsod sa Hunyo 30.
Apang nagapati si Nacion nga naglapta lamang pinaagi sa text message ang mensahe kag indi matuod nga naggikan sa pulisya.
