ROXAS CITY -Nagasugod na ang gobyerno-probinsiyal sang Capiz sa pagbaton sang application sa mga luyag mag-apply sang scholarship para sa school year 2020-2021.
Ini ang ginkompirmar ni scholarship coordinator Rovil Villasoto sang mainterview sang Bombo Radyo.
Ginpahayag ni Villasoto nga mahimo na nga makakuha sang application form ang mga aplikante sa kapitolyo-probinisyal ukon sa official facebook page nga Capiz Scholarship and Educational Assistance Program.
Suno kay Villasoto nga kinahanglan nga mapasaran sang mga applicants ang written exam kag interview nga igahatag sang probinsiya ang mga aplikante agud makabaton sa scholarship sang probinsiya.
Gindugang sini nga may yara sang mga requirements para sa mga nakapasar sa examination kag interview agud makabaton sang scholarship.
Kalakip sa mga ginatanyag nga scholarship sang probinsiya nga sarang ma-avail sang mga estudyante amo ang (EVAF) ukon Special Courses Scholarship kun sa diin makabaton sang P10,000 per semester ang mga scholars; Merit Scholarship kun sa diin makabaton sang P5,000 ang mga scholar nga naka-enrol sa public schools kag P2,500 para sa mga scholars nga naka-enrol sa mga private schools; Technical Vocational Scholarship kun sa diin sa wala sang bayaran ang scholars; kag Educational Financial Assistance Program (EFAP) kun sa diin makabaton sang P1,500 nga financial assistance ang mga scholars sang naka-enrol sa mga public schools magluwas pa sa scholarship grant nga ila mabaton.
Gin-athag man ni Villosoto nga ang mga existing scholars nga nakabaton sang nagligad nga tuig 2019 ang kinahanglan nga mag-apply liwat agud makabaton sang scholarship samtang ang mga existing scholars nga nakabaton sang scholarship sang tuig 2018 panubo ang indi na kinahanglan pa nga mag-apply.
Samtang ang deadline sang pagsumiter sang application ang gintalana sa June 12, 2020 apang posible nga palawigon pa bangud sang COVID-19 pandemic.
