ROXAS CITY, CAPIZ – Gin-athag sang Capiz State University ang pagsulundan para sa hiwaton nga graduation ceremony sa Capiz Gymnasium, Villareal Stadium sa palaabuton nga Hunyo 18.
Sa interview sang Bombo Radyo kay Mr. Christian George Acevedo, Public Information Officer sang Capiz State University, iya ginpahayag nga bangud sa kadamuon sang magradwar subong nga tuig, simple lang ang hiwaton nga graduation ceremony.
Suno kay Acevedo, wala ginadumilian ang mga graduates nga mag-upod sang ila nga ginikanan ukon sin-o man nga myembro sang ila pamilya apang limitado lamang sa duha ka persona sa diin may yara sang designated area para sa ila sa guwa sang Capiz Gymnasium kag may yara man sang led wall agud makit-an ang graduation ceremony.
Pahayag niya, kabug-osan nga 5,100 graduates nagikan sa nagkalain-lain nga mga campus sang CAPSU sa probinsya.
Antes ang graduation ceremony, patigayunon ang recognition programs sa mga campuses umpisa subong nga semana kag diri hatagan kahigayunan nga makamartsa ang mga ginikanan kaupod ang ila kabataan nga may pasidungog ukon latin honor.
Dugang pa sang natungdan, lauman subong nga semana nga makapaguwa ang CAPSU sang procedures sa graduation ceremony agud maathagan ang mga ginikanan kag estudyante.
Nagpanugyan man si Acevedo nga indi magduha-duha nga magpalapit sa opisina sang unibersidad ukon sa mga Campus Administrator agud mabuligan kag maathagan kun may yara man sang concerns.
– Reported and Interviewed by Bombo Jessa Mae De Los Santos
